戀事比工作嚟得精采嘅崔建邦(Amigo),喺16年初同林珊珊嘅細女李怡(野人)撻著,雖然佢哋拍拖嘅日子唔係好耐,不過已經有傳話崔建邦做番有腳雀仔,願意停低落嚟同野人結婚,但係最終呢段情玩完,舊年年尾宣佈手已分。

查實嗰陣有傳Amigo同野人分手後,火速撻著ViuTV文青女神李靖筠(Gladys),不過Gladys事後回覆《蘋果》就話:「唔係事實呀,我同佢本身唔太熟,我都唔知點解會傳咗件咁嘅事。」日前有周刊報道話陳雅倫經好友林國斌介紹,同崔建邦撻著,喺陳雅倫生日會,兩個人成晚攬住滿場飛,當其他人透明,不過陳雅倫當然否認呢件事喇。

啱呀,Amigo嘅新歡其實係另有其人,日前有《蘋果》讀者李先生,佢透過「爆相爆片」喺油麻地捕獲Amigo同新歡拍拖!

李先生話大約係夜晚8點左右,Amigo同長髮新歡現身油麻地碧街,嗰陣佢哋兩個等過馬路,長髮新歡嗰個袋拎咗一包糖同崔建邦一齊食,之後佢就蹺住男友隻手,佢仲話:「嗰陣佢哋去咗去廣東道一間賣咖喱嘅餐廳,雖然佢哋只係得兩個人,不過都外賣幾袋食物,全部都係崔建邦一個人拎晒,嗰個長髮女仔蹺住佢,一齊行咗去露天停車場拎車。」

最後崔建邦先讓長髮新歡上車,自己再去用八達通繳費,最後先揸車走人。

(蘋果日報)