藝人黃嘉樂雖然曾與「發電廠」江嘉敏傳緋聞,不過其實佢同攝影師女友Samantha感情非常穩定。

Samantha仲唔介意同嘉樂緋聞女友江嘉敏三人行!

最近仲拍拖兩周年,嘉樂就Sweet爆喺電台點唱送畀女友,搞喊對方,真係冧到爆呀!

原來Samantha好鍾意聽「音樂情人」鄭子誠嘅電台節目,嘉樂就喺大氣電波中示愛,子誠就用把招牌磁性聲線讀出:「Samantha,不經不覺,我哋已經一齊兩年,好多謝你出現喺我生命裏面,我愛你,嘉樂!」之後就播出鄭伊健首情歌《感激我遇見》!Samantha留言:「估唔到今晚我地(哋)各自收工出黎(嚟)食個快飯,食食下(吓)Mr.💛無啦啦開收音機,我秒哭左(咗)啊!」

嘉樂仲上載一張兩人喺維港下攬實女友嘅相:「Happy anniversary !
妳快樂所以我快樂😘」原來係Samantha嘅「回禮」,身為攝影師嘅佢,幫客人影唔少靚相,今次終於到佢同嘉樂做主角,不過依然係佢操刀,連陳敏之都留言:「好勁呀!點影架(㗎)!幫我影呀!」網民都催佢哋結婚呀!

(on.cc)