何家千金何超蓮出席卡地亞活動,今次是超蓮與竇驍公開認愛後首度現身,講到早前認愛內地男星竇驍,佢表示多謝大家嘅祝福。

問到幾時開始戀情:「都有一段時間。(有冇半年?)總之一段時間啦。(畀男友幾多分?)好好。(媽媽見過未?)未,遲啲啦,佢有話帶返嚟屋企食飯。至於爸爸都未,遲啲講。(畀人影到先公開?)係,本來都冇話唔認,諗住畀人見到先公布。」

提到正處於熱戀期,超蓮全程甜笑表示怕醜,而講到生日將至,會唔會同男友慶祝,佢就說:「畀啲空間我哋啦,好開心,多謝大家關心。(正日帶埋男友同屋企人一齊慶祝?)正日反而唔係同屋企人,因為細佬有嘢做,會提早食飯。(咁同男友二人世界?)唔好咁問我啦,我依家都未知有咩安排。」

談及與男友分隔兩地,佢坦言只要有心總會搵到時間見面,又指鍾意有上進心嘅男仔,所以明白男朋友職業需要,唔會介意佢與其他女星拍親熱戲,會尊重對方。

講到好姊妹鄧紫棋(G.E.M.)社交網送祝福,佢表示:「我有介紹佢哋見過面,佢都話呢個男朋友唔錯。(G.E.M.係咪呷醋?)佢係戥我開心,因為之前我冇拖拍,佢就做住我男友先,所以依家講笑變咗前男友,但佢都係想參與呢件事啫。」


另外,超蓮透露戴上嘅私伙頸鏈別具意義:「係媽媽喺夾萬攞出嚟畀我,全世界得一條,係之前爸爸喺特別日子送畀佢,係High Jewelry,鑲工用石都為呢個設計度身訂做,係獨一無二。(第時結婚都想有獨一無二嘅珠寶?)都想,但未必係一set珠寶,可以係啲小首飾,心意最緊要。」

佢續指媽媽送頸鏈畀佢,可以不斷傳承下去,至於問到媽媽有冇催婚,佢就笑指:「媽媽好chill,畀好多空間我,順其自然。」

(綜合報道/on.cc)