容祖兒《PRETTY CRAZY JOEY YUNG CONCERT TOUR》演唱會踏入第九場,她請來同公司的好姊妹Twins蔡卓妍(阿Sa)、鍾欣潼(阿嬌)及好兄弟關智斌(Kenny)任特別嘉賓。

祖兒介紹Twins為重量級女子組合:「我哋一齊長大,經歷嘅唔係你哋能夠想像咁多,我曾經喺佢哋演唱會上飲大咗,上次演唱會真係好好玩,真係要好信得過,好有親切感,好有歸屬感,我先夠膽死台上面飲大咗!今日唔知佢哋點對我,希望佢哋錫住我啦 。」然後唱《風箏與風》一曲邀請Twins上台。

阿Sa和阿嬌兩位孖妹出現馬上獻唱《大紅大紫》一曲,全場哄動,歌畢阿Sa話:「我哋今日其實呢帶咗啲大禮嚟畀你,我想話雖然容祖兒冇乜緋聞,你唔好以為佢冇人追,真係好多人追佢㗎,今日已經有幾個喺度。」祖兒嚇一嚇,阿嬌就反問:「你係咪想講日本嗰個?」阿Sa問:「係咪真係講得㗎?」祖兒搶說:「唔係,揞住你哋個嘴,佢哋(觀眾)冇人想聽我緋聞。你試吓再講,我拎對鞋塞住你個嘴!」

阿Sa不肯罷休:「做乜啫!我想話好多人鍾意你,但你未同人開始就終止人哋關係……」祖兒解釋:「我要專注事業,如果拍拖點做咁精彩演唱會!影響晒囉!」阿Sa問觀眾:「大家都好想祖兒可以搵到個好歸宿,係咪先?」全場應同,至於主角就低頭扮怕醜:「我真係『龜縮』……」

Twins再說:「算啦,但係鍾意你嘅人裏面,其中有一個好靚仔,今晚死要同你唱歌,佢有好多腹肌。」觀眾估到是Kenny,祖兒就話:「咁呢個可以攞出嚟見吓大家嘅,佢係邊?喺下面?咁我要出力請佢上嚟。」然後狂做「標童」動作,笑死觀眾。接着Kenny升上台和三女齊唱《死性不改》,全場high爆!

祖兒問Kenny:「你做咩唱得咁興奮?」阿Sa代答:「佢要綵排定啦,佢9月(14日)自己紅館演唱會呀。」阿嬌就搶住話:「係呀,中秋節呀!佢已經賣晒(飛)啦!依家加場!」而Kenny就跪拜阿嬌:「嬌姐,你畀個機會我自己講啦。」繼而他興奮站在台中, 高舉勝利手勢大叫:「大家好!關智斌《Kenny is BORN演唱會》依家正式宣布加(9月13日)場!」全場萬多觀眾都戥Kenny開心,瘋狂歡呼。

祖兒更興奮到扮大叔跳舞,但畀阿Sa拉起身話:「你咪跳啦,一陣整親腰呀。」隨時,阿嬌問Kenny:「你依家加場,個演唱會有咩吸引人先,點同大家賞月?」他說:「你唔使賞月啦,你屋企有個Michael(阿嬌老公),實畀你賞啦!」

阿嬌老公賴弘國(Michael)也有坐於觀眾席捧老婆場。

楊受成夫婦當然有到場支持。

鍾舒祺、鍾舒漫及王君馨也有撐場。

 

 

(on.cc)